Яңылыҡтар

Ҙур этнографик диктант

Быйылғы диктант 3–8 ноябрь арауығында онлайн-алымда ойошторола. Ул халыҡтың этнографик, Рәсәйҙә йәшәгән халыҡтар тураһында белем кимәлен баһаларға, киң ҡатлам йәмәғәтселектең иғтибарын милләт-ара татыулыҡ һәм берҙәмлек мәсьәләләренә йүнәлтергә булышлыҡ итә. Өмөтбай мәктәбе коллективы, уҡыусылар ҙа был ҙур сарала әүҙем ҡатнаштылар.

Сертификат_БЭД_2020

Йәш шағирҙар һәм яҙыусылар клубы

https://proektddt.ru/ru/course/calendar-bash/ һылтанмаһы буйынса, Башҡортостан Республикаһының йәш яҙыусылар һәм шағирҙар клубы уҡыусылар өсөн онлайн дәрестәр үткәрә. 10-12 һәм 13-18 йәшлектәр өсөн Лилиә Һаҡмар, Рәзилә Ырыҫҡужина алып барған дәрестәр бик йәнле, фәһемле үтә. Буласаҡ ҡәләм тирбәлтеүселәргә матур кәңәштәр тик файҙаға ғына. Әлеге ваҡытта «Лукоморье» конкурсына әҙерлек эштәре башланды. Киләһе дәрестәр 3 ноябрь көнөнә планлаштырылды.

Онлайн конференция

Көҙгө каникул осоронда мәғариф бүлеге тарафынан уҡыусылар һәм уҡытыусылар өсөн онлайн конференциялар, вебинарҙар, семинар һәм оҫталыҡ кластары үткәрелә. Бөгөнгө көндә, планға ярашлы, башҡорт теле һәм әҙәбиәте уҡытыусылары өсөн «Шәхес тәрбиәләүҙә нәфис әҙәбиәттең роле» тигән темаға онлайн конференция үтте. Уҡыусыларға «Атай икмәге» хикәйәһе аша яҡшы таныш булған яҙыусы, журналист Ф.Аҡбулатова менән әңгәмә бик фәһемле, рухлы булды.

Олимпиада

Йылдағынан айырмалы рәүештә быйыл башҡорт теле һәм әҙәбиәтенән мәктәп олимпиадаһы онлайн үткәрелде. Ситтән тороп үткәрелеүгә ҡарамаҫтан уҡыусылар әүҙем ҡатнашты, эштәрҙе лә ваҡытында тапшырҙылар. Муниципаль этапҡа үтеүселәргә уңыштар юлдаш булһын!

Башҡорт теле һәм әҙәбиәте.Олимпиада һорауҙары. 1 линия (1)

Рейтинговая таблица ВОШ по башкирскому языку и литературы СОШ д.Уметбаево

Матбуғатҡа яҙылырға онотманығыҙмы?

2021 йылға ваҡытлы матбуғатҡа яҙылыу башланды. Милли матбуғат яҙмышы бөгөн хәл ителә, дуҫтар! Матбуғатҡа яҙылайыҡ – милләтебеҙҙе ҡурсалайыҡ!

«Башҡорт теле һәм әҙәбиәте буйынса йыл уҡытыусыһы-2020»

        «Йыл уҡытыусыһы-2020» республика конкурсы тамамланды… 8 көнгә һуҙылған, 8 ярыш төрө булған конкурс тәүҙә сиге күренмәҫ һымаҡ ине. Ләкин матур ойошторолоуы, изге теләктәр, берҙәмлек менән бер тынала үтеп тә китте. Тәьҫораттар әйтеп бөткөһөҙ. Йоҡоһоҙ төндән һуң йылмайып, һыр бирмәй сығыш яһауҙар, яңы таныштар, эш алымдары, күҙ йәштәре һәм бәхетле минуттар… Ғөмүмән, конкурс ҙур тәжрибә һәм һынау мәктәбе булды.
       Тағы ла ғаиләңдә, мәктәбеңдә һине аңлап, ярҙам итеп торһалар ғына, тыныс күңел менән, ышаныслы сығыш яһап, һөҙөмтәгә өлгәшергә булалыр ул. Мине лә аңлаған, терәк булған тормош иптәшемә, ҡыҙҙарыма, атай-әсәйемә, ҡәйнәмә, бөтә туғандарыма, дуҫтарыма, мәктәбем коллективына, мәктәп администрацияһына, көн дә изге теләктәрен теләп ултырған өләсәйҙәремә ҙур рәхмәт. Айырым рәхмәтем миңә ышаныс белдергән район мәғариф бүлегенә һәм минең менән конкурстың башынан алып аҙағына тиклем бергә булған Ниғмәтуллина Лиза Урал ҡыҙы һәм Йәнбирҙина Сәлхиә Нурмөхәмәт ҡыҙына. Барығыҙға ла ғаилә именлеге, уңыштар теләйем.

Матбуғатта

Халыҡ-ара туған телдәр көнө, Башҡорт теле йылы уңайынан «Һаҡмар» район гәзитендә тотош бер бит итеп беҙҙең уҡыусыларҙың мәҡәләләре баҫылды. «Бөгөн Өмөтбай мәктәбе уҡытыусыһы Альбина Садыҡова әҙерләгән махсус битте тәҡдим итәбеҙ. Балаларҙың ижады менән танышып, уларҙың ни тиклем бай телле, рухлы булыуҙары менән һоҡланырға һәм уларҙан үрнәк алырға ҡала»,- ти улар баш һүҙҙә. Редакция хеҙмәткәрҙәренә беҙ ҙә рәхмәт һүҙҙәребеҙҙе еткерәбеҙ. 

Туған телдәр көнө

Халыҡ-ара туған телдәр көнөндә Өмөтбай уҡыусылары башҡорт телендә диктант яҙҙы. Бөтә донъя башҡорттары ҡоролтайы ойошторған сара 112-се Башҡорт кавалерия дивизияһы командиры, генерал-майор Миңлеғәле Шайморатовтың тыуыуына 120 йыл тулыуға арналды.   

Семинар

“Башҡорт теле һәм әҙәбиәте йыл уҡытыусыһы” конкурсына әҙерлек сиктәрендә 14 февраль көндө Башҡортостан Республикаһы Мәғарифты үҫтереү институтында семинар үткәрелде. Конкурсты ойоштороусылар бәйгенең үткәрелеү тәртибе, яңылыҡтары, баһалау критерийҙары менән таныштырҙы, һәр этап буйынса фәһемле кәңәштәр бирҙе. Баш ҡаланан һорауҙарыбыҙға яуап табып, ҡанатланып ҡайттыҡ.

Еңеүҙең 75 йыллығын ҡаршылап

Башҡорт теле һәм әҙәбиәте кабинетында Хәтер һәм дан йылы уңайынан мәғлүмәти мөйөш булдырылды. Бында яугир-шағирҙар тураһында папкалар, ауылыбыҙҙан Бөйөк Ватан һуғышында ҡатнашыусылар хаҡында яҙмалар, китаптар, яҙыусыларҙың ҡанлы йылдар һәм Еңеү байрамы тураһында шиғырҙары тупланған папкалар, уҡыусыларҙың тематик ижади эштәре урын алды.

Башҡорт теле йылы

Башҡорт теле йылы уңайынан башҡорт теле һәм әҙәбиәте кабинетында «Әсәм теле-сәсән теле» стенды тулыландырылды. Йыллыҡ планға ярашлы кластан тыш саралар, ижади конкурстар үткәреү өсөн тематик папкалар эшләнелде.

«Һеңлекәш» фильмы

Мостай Кәримдең «Беҙҙең өйҙөң йәме» әҫәре буйынса төшөрөлгән «Һеңлекәш» фильмы, ниһайәт, беҙҙең яҡтарға ла килеп етте. Йөрәккә үтеп  инерлек, тәрән хис-тойғо менән төшөрөлгән фильмдан рух күтәрелеп, ҡыуанып ҡайттыҡ. Тыуған илгә һөйөү менән һуғарылған, дуҫлыҡ менән тоғролоҡ кеүек мәңгелек төшөнсәләрҙе сағылдырған картиналар барыһының да күңелен арбаны.